Physical Address
304 North Cardinal St.
Dorchester Center, MA 02124
رواية أبيض وأسود الفصل السابع والعشرون 27 بقلم منى محمود
رواية أبيض وأسود البارت السابع والعشرون
رواية أبيض وأسود الجزء السابع والعشرون
رواية أبيض وأسود الحلقة السابعة والعشرون
الشر والخير موجودين جوة كل واحد فينا
.. نسبة الشر اللي جوانا بتختلف من شخص للتاني ومهما كان الشخص اللي قدامك كويس وسوي اوعي تفتكر أن معندوش اي شر جواه اكيد موجود ممكن تكون نسبته قليله .. جايز هو بيقاوم شره وبيعافر مع نفسه .. الأكيد أن كل إنسان فينا جواهر نسب للخير والشر
*******************************************
سوزي كانت منفعله وبسمة كانت حاسه ان اكيد في حاجة غلط قاطع كل دا دخول بكر ووراه عز اللي الغضب كان باين جدا علي ملامحه …
سوزي
ــ اهلا اهلا بالنصاب اللي فاكر نفسه زكي وجاي يلعب علينا
عز قرب منها واتكلم بغضب وحزم
ــ انتي تخرسي خالص … بقا بعد العمر دا كله يا سوزي وبعد كل اللي حصلنا لسه زي ما انتي متغيرتيش
وقبل ما ترد سوزي اتكلم بكر بهدوء
ــ نانيس اطلعي انتي علي مكتبك والغي اي مواعيد انهاردة يلا
نانيس هزت راسها بموافقه وخرجت بسرعه وسوزي استنت لما الباب اتقفل عليهم واتكلمت
ــ في ايه يا عز بالظبط عشان حاسه كدة أن في حاجة بتحصل من ورا ضهري أنا مش فاهمها
عز
ــ انتي بتتعاملي مع الناس اللي شريف كان شغال معاهم في غسيل الأموال من أمتي يا سوزي ؟؟
بسمة برقت وبصت ل بكر اللي بصلها بحزن وهز رأسه وسكت
سوزي اتوترت ودا بان عليها ل عز اللي حافظها اكتر من نفسها
ــ ايه ايه اللي انت بتقوله دا يا عز جبت الكلام دا منين علي فكرة بقا أنا بقالي فترة شاكه أن بكر دا مزقوق علينا من بهاء وان بهاء اكيد بياخد حق أمه مننا دلوقتي فاكر نفسه بقا موضع قوة واحنا عشان اللي حصلنا بقينا موضع ضعف بس لا أنا فاهمه كل دا كويس وانت يا عز متخليش حد يلعب في دماغك ويقلبك علي اختك حبيبتك اللي ملكوش غير بعض في الدنيا دي هه متنساش دا
عز بحزن
ــ أنا بجد مصدوم فيكي ازاي كل اللي حصلنا دا مأثرش فيكي .. ازاي محستيش انك لازم تتغيري معقول موت مهاب بالطريقه دي مهزش شعره منك عشان تتغيري معقول بعد كل السنين دي مصرة تكلمي في نفس السكة … ( ملامحه اتحولت ل غضب ) انطقي بقالك اد ايه بتتعاملي مع الناس دي خليني الحق اتصرف دي اول عمليه ولا في غيرها ؟ انطقي يا سوزي
سوزي بسخريه
ــ اتغيرت يا عز يا خساره عموما عشان اريحك الناس دي انا اللي معرفاهم علي شريف اصلا بس مكنش ينفع اقول قدام حضرة الظابط وشريف رغم أنه فيه كل العبر بس مقالش حاجة تخص الموضوع دا وتورطني فيه ارتحت كدة اه حاجة كمان قبل ما تتكلم … دي فلوسي وانا حرة فيها أنا كرم مني جبتكم معايا الفيلا والشركة لكن هتقعد تقولي اي دا وازاي وتعيش دور اللي تاب علي كبر هقولك مع السلامة يا حبيبي شوفلك حته تانيه انت وبنتك تقعدو فيها
كلهم بصولها بصدمة ونظرات الصدمة عند عز كانت مصحوبه بنظرات خذلان وحزن ومقدرش يرد واللي رد كانت بسمة
ــ وهو حضرتك فاكرة أن في حاجة هتحصل غير كدة احنا نمشي اكيد والحمد لله أن كل حاجة باسمك وانا هنزل من هنا علي الشهر العقاري الاول وهلغي التوكيل اللي انتي عملوهالي أنا مضمنكيش بصراحة واوعي تكوني فاكرة اني سيبت شغلي اللي بحبه وحياتي اللي متعودة عليها وجيت اشتغل معاكي هنا عشان الفلوس ولا عشان الفيلا تبقي غلطانة يا عمتو انا من يوم ما عرفت حقيقتكم زمان وانا مقررة اني افضل بعيد عنكم مجرد ابركم مش اكتر زي ما ابيه بهاء فهمني عشان ميبقاش حرام عليا ولما أبيه مهاب مات وحسيت بحزنكم عليه وبابا قال إن دا عقاب ربنا له في الدنيا وعيط وندم من قلبه أنا فرحت وقلت هقف معاكم لآخر نفس فيا وسبت كل حاجة وبقيت معاكي ف اوعي تفتكري للحظة واحدة أن الفلوس هتفرق معانا الفلوس مبتفرقش غير مع اللي زيك انتي وبس يا عمتو
سوزي
ــ خلصتي ؟ ياريت تتفضلو بقا كلكم عشان ارجع اكمل شغلي ومتنسيش تخرجي من الشهر العقاري ع الفيلا تاخدو حاجتكم وارجع بالليل مليش حد فيها يلا خلي كل واحد يشيل شيلته بقا وخدو المخبر اللي جاي بعملي فيها ظابط هنا دا معاكم يلااا
بكر كان ساكت طول الوقت حس انه ملوش اي صفه عشان يدخل في الحوار هو كشفها وقال ل عز ولحد هنا دوره انتهي بس مقدرش يطلع من الاوضه ويسيبهم فضل واقف سامع وساكت ولما طردتهم بالطريقه دي بص بسرعه علي عز وحس أنه مش واقف مظبوط وبدأ يتعب ودا ظهر عليه لما مسك في الكرسي اللي جمبه جري عليه بكر وبسمة بسرعه وهو رد بصوت كله وجع
ــ مشوني من هنا
اتحرك بخطوات بطيئة وهما حواليه مسندينه نزلو وعز أصر ان بسمة تطلع علي الشهر العقاري الاول تتنازل عن التوكيل وبعدها يشوفو هيعملو اي وبكر كان معاهم
*****************************************
بهاء وصل للمكان اللي بدور فيه وهي أول ما لمحت عربيته قدام المحل قامت بسرعه وحسبت علي الكشري الي ممدتش ايديها فيه وطلعت وركبت جمبه وهي مكشرة وتاليا نايمة علي ايديها بهاء اطمن أنهم كويسين واتحرك بالعربيه من غير ولا كلمة وبعد صمت خنقهم هما الاتنين حوالي عشر دقائق اتكلم بهاء
ــ الست دي عايزة منك اي ؟ اي يخليها عايزة تاخد منك بنتك ؟ وليه دلوقتي ؟
بدور ردت بدون ما تبصله
ــ متشغلش بالك كل اللي مطلوب منك هو رجاء بس بحكم العشرة انك توصلني ب بكر واحنا بنعرف نتصرف في مشاكلنا كويس مش محتاجين مساعدة من حد
بهاء بعصبيه
ــ اتعدلي يا بدور متعصبنيش عليكي اكتر من كدة
بصلته واتكلمت بغيظ
ــ أنا معدوله والله الدور والباقي علي اللي ماشي ينظر علي الناس وخلاص لا بيراعي مشاعر حد ولا بتفرق معاه العشره
ــ أنا !! أنا مبتفرقش معايا العشره يا بدور أنا ؟؟؟؟
ــ اه انت يا بهاء وبقولك اي أنا مش عايزة افتح في القديم أنا والله العظيم لو ليا اي حد تاني اكلمة مكنتش اترددت لحظة واحدة بس للاسف أنا كنت لوحدي في وسط الشارع وبكر مختفي وملقتش غيرك ف لو سمحت من فضلك وصلني بس ب اخويا ويبقي كتر الف خيرك علي كدة لأن تلفوني كمان فصل شحن يعني مش هعرف ارن عليه من عندي
نفخ بضيق وغيظ منها ومن طريقتها ومسك تلفونه واتصل علي بكر كان غير متاح لسه ف جرب واتصل تاني علي بسمة والمرة دي ردت عليه وصوتها مخنوق بالعياط
ــ أيوة يا أبيه
ــ مالك يا بسمة في ايه ؟ وفينكم كلكم مختفيين ليه ؟
ــ حصلت حاجات كتير انهاردة بس مش هينفع نتكلم في التلفون
ــ طب المهم فين بكر تلفونه مقفول من بدري ليه ؟ مش انتم مع بعض في الشركة
ــ بكر معايا في العربيه احنا لسه طالعين من الشهر العقاري كنت بلغي التوكيل اللي عمتو عملتهولي وبابا كمان معانا
ــ بابا !! في اي يا بسمه ؟
ــ احنا هنروح علي الفيلا ناخد حاجاتنا من هناك ونطلع علي الشقه اللي حضرتك كنت قاعد فيها اللي قدام بكر هنستناك هناك لما تيجي هقولك علي كل حاجة يا أبيه
ــ شقه ؟ ( بص ل بدور اللي مش فاهمه حاجة وافتكر موضوع حماتها) لا مش هينفع تروحو علي هناك بقولك اي اديني بكر يا بسمة
مدت بسمة ايديها بالتلفون ل بكر وهو سايق … كان متردد يرد عليه ولا لا مش عارف لو خد التلفون هيتكلم معاه ازاي طب هو اصلا عايز يسمع صوته ولا لا فضل يبص للتلفون ويبص ل بسمة اللي بتترجاه بعينها أنه يرد وبعدين اتنهد وخد التلفون ورد بجمود هو نفسه استغربه
ــ الو
ــ بكر بدور اختك معايا و
ــ نعم !! اختي معاك يعني اي ؟ ادهالي لو سمحت ولا اقولك اقفل وانا هكلمها
ــ ما تصبر يا بني آدم انت لما اكمل كلامي في اي وانا خطفاها … تلفون اختك فاصل وحاولت تكلمك كتير علي فكرة وانا كمان بس انت تلفونك ديما غير متاح دا اللي خلاها تكلمني أما بقا ليه واي حصل ف أنا كمان مش فاهم في اي عندك ومش هينفع نطلع علي عندك دلوقتي من غير هري ورغي يا بكر لما نتقابل كلنا نبقي نعرف في اي خلص اللي بتعملوه وتعالو علي عندي بس كلمني من تلفون بسمة لما تقربو علي عندي عرفوني يعني
ــ نعم ؟؟ عندك ازاي انت خلاص هبت منك علي الاخر احنا لسه هنطلع علي الفيلا وبعدين يلمو حاجتهم ونتحرك يعني بالميت اوي فيها تلت اربع ساعات عايز تاخد اختي عندك وتقعدو لوحدكم المدة دي كلها اتجننت يا بهاء ولا ايه ؟
ــ والله العظيم يا بكر لما نتقابل ل عرفك مين دا اللي اتجنن علي حق يا اغبي خلق الله ما بقولك عرفوني لما تقربو لاني اكيد مش هطلع الشقه ب اختك لوحدنا هنفضل نلف بالعربيه لحد ما تقربو ونطلع كلنا سوا علي عندي عشان نتكلم اتعدل يا بكر وافتكر انت بتكلم مين مش بهاء الدميري اللي يعدي الأصول
بدور حبت تهدي الوضع بينهم شويه مدت ايديها وبصلته عشان يديها التلفون … بهاء كان بيتنفس بغضب وخنقه مكنش متخيل ان ممكن الحوار بينه وبين بكر يبقي كدة وان ثقه بكر فيه اللي كانت من غير حدود تتبخر في ثواني بالشكل دا … بص ل بدور وحاول يهدي نفسه واداها التلفون وبص قدامه علي الطريق من غير كلام
ــ الو يا بكر
ــ بدور ! انتي كويسه في ايه حصل ؟ طمينين عليكي وتوتي فين هي كويسه ؟
ــ احنا الاتنين كويسين يا حبيبي اطمن كل الحكايه اني حصلت حاجة كدة وانا قلقت افضل في البيت لوحدي ولما كلمتك وانت تلفونك غير متاح كلمت بهاء وهو جالي علي طول وانا معاه في العربيه دلوقتي اهدي بقا عشان خاطري
ــ حاجة ايه يعني متسبنيش كدة الفكر يجبني ويوديني
ــ ماما امجد اتصلت بيا وقعدت تزعق وقالت إنها هتيجي وتاخد تاليا مني ف خوفت ونزلت من البيت ركبت تاكسي ولما لاقيت تلفونك مقفول وانا معرفش مكان شغلك اتصلت ب بهاء وهو جالي بس كدة متقلقش لما اشوفك هقولك علي كل حاجة بالتفصيل المهم اننا كويسين والله
ــ طيب تفضلو في العربيه يا بدور لحد ما ارن عليه متطلعيش معاه لحد ما اجي أنا ونطلع كلنا سوا سامعه ولا لا
ــ حاضر يا بكر حاضر يلا هقفل أنا وهستناك تمام
ــ تمام أن شاء الله متاخرش عليكي سلام
ــ سلام
المشهد كان في العربيتين ميختلفش كتير بهاء وبكر ملامح الغضب كانت علي وش كل واحد فيهم وبدور وبسمة كانت نظراتهم كلها حزن
عند بهاء
بعد ما قفلت بدور مع بكر فضلت ساكتة عايزة تتكلم وتهدي بهاء عايزة تفهمه سر غضب بكر وأنه مش قله ثقه زي ما هو فهم بس خايفه منه ومجروحة وعشان تفهمه موقف بكر بالظبط هتقلل من نفسها قدامه وهتفتح موضوع وعدت بكر أنه اتقفل خلاص قاطع أفكارها مع نفسها صوت بهاء وهو بيتكلم بعصبيه وسخريه
ــ ايه طمنتيه خلاص ؟ ووصاكي متتطلعيش مع بهاء الشقه مش كدة ؟ للدرجة دي انا نزلت من نظركم انتم الاتنين … انتي تقوليلي اني مصنش العشره وهو يقولي اختي متطلعش الشقه معاك لوحدك … دي اخرتها بجد
بدور حاولت تفضل ساكته بس طريقه بهاء خلتها متتحكمش في نفسها
ــ بطل تعيش دور الضحيه يا بهاء بطل تاخد ردود الفعل علي انها فعل مش احنا اللي ظلمناك ولا احنا اللي خدنا منك موقف انت اللي بدأت وبكر بيرد علي فعلك انت ف بلاش تسيب فعلك وتقعد تتكلم علي رد فعلنا انت مش صغير علي كدة دا انت ظابط قد الدنيا
ــ أنا مظلمتش حد أنا اتصدمت من الكلام اللي اتقال وقلت حاجات كتير من صدمتي بس اخوكي مصبرش حتي اني استوعب اللي سمعته صعب عليه يديني فرصه افهم اللي اتقال وكمل عليا وداس عليا بالقوي يا بدور ودلوقتي بيحسسني اللي كل سنين معرفتنا ببعض دي ملهاش لازمة أنا حتي لو زعلنا سوا لا فكرت اتصل ببسمة ولا للحظة شيكت أنه ممكن يأذيها ثقتي فيه ملهاش حدود وعمر اللي حصل ما أثر فيها ازاي هو قدر يشك فيا بالشكل دا ازاي
بدور بنبره حزينه وخجل
ــ بس بكر مش شاكك فيك يا بهاء … بكر مش عايز صورتي تنزل في نظرك اكتر من كدة خايف اطلع معاك من ثقته فيك وانت تفكر اني بستعطفك أو بجري وراك أو اني سهل عليا اطلع مع اي حد بكر في مليون سيناريو في دماغه لو طلعت معاك انت تاخده عننا لكن مش هو اللي مش واثق فيك في فرق يا بهاء
بهاء الصدمة لجمتة ل دقيقه
ــ انتي اكيد بتهزري صح ؟؟ لا لا بتهزري اكيد اه هو شاكك فيا اكيد زعلان ف بقي مش واثق فيا زي الاول لكن اللي انتي بتقوليه دا لا اكيد هزار سخيف
ــ مش هزار انا واثقه في كلامي يا بهاء ودا اللي كان مخليني مش عايزة اتصل بيك لما لاقيت تلفونه غير متاح بس لما السواق نزلني ومشي معرفتش اتصرف و كلمتك
ــ ازاي ازاي يفكر فيا كدة وليه ؟
ــ شوف انت قولتله ايه يوم ما شديتو سوا وصل الأمور بينكم ل كدا أنا معنديش حاجة تانيه اقولها
سكتو هما الاتنين بس التفكير كان هيجننهم هي كانت مش عارفه معني كلامه ايه في كان محتاج وقت يستوعب اللي اتقال وهو مكنش فاهم ازاي بكر يفكر كدة
في عربيه بكر عز كان شارد في دنيا تانيه لا ركز في مكالمة بهاء ل بسمة وبكر ولا حتي خد باله من كلامهم سوا بعد كدة
بكر لما قفل مع بهاء كان متلخبط وراسم الجمود علي ملامحه بيحاول يفهم إحساسه اي والاصعب أنه مكنش متخيل أنه هيشوف بهاء بسرعه كدة
ــ بهاء مش وحش يا بكر عشان تحذر اختك من بهاء اخويا راجل محترم وجدع وانت عارف كدة كويس بلاش خلاف بينكم يدمر كل حاجة حلوة بالشكل دا انت اعقل من كدة يا بكر
ــ ومين قالك اني شاكك أنه مش محترم ولا جدع اسكتي يا بسمة الله يخليكي انتي مش فاهمه حاجة
ــ طب فهمني انت معني كلامك ل بدور دا معناه ايه ؟
ــ معناه اني مبقتش عارف اخوكي شايفاني انا واختي ازاي يا بسمة معناه أنه ممكن يفكر أن اختي بتجر رجله عشان يرجعلها أو أنها مثلا اخترعت اي حاجة عشان تكلمه أو أنها سهل تطلع مع اي راجل شقته معرفش معناه حاجات كتير ممكن اخوكي يظنها في اختي أنا خلاص مبقتش عارف هو شايفنا ازاي يا بسمة وبقيت متوقع منه اي حاجة
ــ اي اللي انت بتقولو دا لا يا بكر استحاله طبعا أبيه عمره ما يفكر فيكم كدة ابدا لو زي ما انت بتقول كان خد اي رد فعل علي شغلك معانا بعد المشكله اللي حصلت بينكم لكن دا محصلش انت ظلمه يا بكر حرام عليك
ــ مبقتش عارف دي كمان يا بسمة مين فينا اللي ظالم التاني أنا ولا هو صدقيني مش عارف
العربيه وصلت قدام الفيلا ونزلت بسمة وخدت عز معاها عشان ياخد العلاج بتاعه لما حست أن التعب بيزيد عليه وفضل بكر قاعد في العربيه مستنيهم وهو شارد في المقابله اللي هتحصل دلوقتي
*******************************************
مؤمن كان في المشرحة سهران يخلص التقرير ل بهاء
وهو بيشرح الجثه لاحظ في منطقه البطن خياطة قديمة ل ست غرز مكان الزايدة الدوديه كتب دا في التقرير بتاعه وكتب أن البتر تم بعد القتل مش قبله وان سبب الوفاه سم شديد المفعول لاقا بقاياه في معدة الضحيه خلص التقرير كام مرهق جدا حاول يفوق نفسه عشان يطلع التقرير علي القسم وبعدين يروح بس كان تعبان بقاله يومين حاسس بوادر دور برد شديد بس بيكدب نفسه وانهاردة اهو جسمة مكسر والدور أعراضه بدات تظهر عليه بوضوح … قام دخل الحمام الملحق بالاوضه بتاعته خد شاور وغير هدومه بالطقم الاحتياطي اللي عنده هناك وعمل كوبايه قهوة كبيره حطاها في الحافظ بتاعه واتحرك علي القسم عشان يسلم التقرير وبعدين يروح ياخد اي دوا وينام
كان طول الطريق مركز أنه يفضل مصحصح ودا خلاه ميركزش في العربيه اللي ماشيه وراه من اول ما اتحرك من ادام المشرحه
وصل علي القسم وسأل علي بهاء وعرف أنه مرجعش علي القسم بعد المعانيه استغرب واتصل عليه ودي كانت المكالمه
ــ أيوة يا مؤمن
ــ انت فين يا بهاء أنا جيت اجبلك التقرير بس ملقتكش
ــ ايه السرعه دي مش متعود علي كدا
ــ والله انت راجل ظالم عشان أنا طول عمري سريع خصوصا في القضايا اللي تخصك عشان عارفك مبتستناش
ــ ماشي يا سيدي شكرا هي جت عليك يعني
ــ جت عليا ازاي ؟ في ايه يا بهاء ؟ أنا تعبان والله وواقف علي رجلي بالعافيه مش ناقصه قلق كمان
ــ تعبان مالك في اي ؟
ــ مفيش دور برد بس شكله شديد شويه .. اخلص انت فين ؟
ــ أنا في مشوار كدة وهطلع علي البيت مش راجع علي القسم انهاردة بس مفيش حاجة متقلقش
ــ اكيد ؟
ــ اكيد يا صاحبي
ــ طيب انا هسيبلك التقرير علي مكتبك واخلع أنا بقا علي البيت عايز مني حاجة تاني يا حضرة الظابط
ــ لا يا دكتور مؤمن شكرا ل خدماتك … امشي يا مؤمن قبل ما اتغابي عليك امشي
ــ هههههههههه طيب متزقش يلا سلام
ــ سلام
قفل مع بهاء وساب التقرير علي المكتب وخرج ركب عربيته علي طريق بيته بس اول ما طلع علي الطريق الدائري العربيه اللي ماشيه وراه فضلت تزنق عليه حاول يتفاداها كتير بس اللي كان سايق كان مصمم يقلب العربيه ب مؤمن وفضل وراه لحد ما حقق اللي هو عايزه وعربيه مؤمن اتقلبت كزا مرة علي الدائري وقتها العربيه الي كانت وراه اتحركت وكملت في طريقها عادي جدا واللي سايق العربيه علي وشه ابتسامه نصر كبيره طلع تلفونه وطلب رقم وقال جمله واحدة بس
ــ العمليه تمت والأول تم التخلص منه
****************************************
سوزي بعد ما بسمة وعز نزلو من عندها خافت من رد فعل بهاء وحست أنه ممكن يبلغ عنها أو يكون بكر معاه دليل قوي عليها كانت مرعوبه من فكرة أنها تتسجن كلمت الناس اللي بتشتغل معاهم وقالتلهم أنها هتهرب علي اي بلد بالفلوس اللي في البنك وطلبت منهم يساعدوها ويوفرولها الحمايه والامان وقفلت معاهم وهي حاسه براحه بعد ما طمنوها أنهم ضهرها ومش هيتخلو عنها جمعت كل الورق المهم اللي في الشركة ومسحت اي داتا ممكن تاخد عليها ونزلت عشان تحضر نفسها للسفر
***★*****★**★**★★*★******★**★***★
بسمة خلصت ونزلت هي وعز وركبت مع بكر تاني وهما في الطريق لشقه بهاء بسمة طلعت تلفونها ورنت علي اخوها وبلغته أنهم في طريق ليهم وهنا بهاء لف بالعربيه ورجع علي طريق شقته بعد ما كان ماشي بلا هدف وبعد حوالي ربع ساعه وصلو العربيتين في نفسه اللحظة و وقفو قصاد بعض واخيرا جت المواجهه اللي اتاجلت كتير بين اتنين كانو ديما سند وضهر لبعض
يا تري ايه هيحصل بينهم ؟
وايه حكايه جثه الطفله اللي ماتت مسمومه ؟
مين قلب عربيه مؤمن ؟
وسوزي هتفلت ولا لا ؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أبيض وأسود)
