Physical Address
304 North Cardinal St.
Dorchester Center, MA 02124
قعدت جمبي وهي بتتنهد:الا صحيح يكوكو هو انتو مساكين اوي كده؟
حطيت ايدي على خدي:احنا مين يحبيبتي؟
جاوبتني وهي بتحط المج قدامي:أهل الحب يقلبي.
اخدت منها المج:وبتسأليني ليه اسألي نفسك ياختي.
=وهو انا الي قاعدة سرحانة ومبوزة من ساعة ما عرفت انه مسافر ولا ايه؟
اتكلمت وهي قايمة بعد ما تيتة ندت عليها:مساكين مساكين يعني.
سابتني وخرجت وانا بصيت للسما تاني وانا بتنهد وبشرب، لحد ما سمعت صوت جرس الباب بيرن خرجت ووقفت على باب البلكونة علشان اشوف مين جاي،
ملك فتحت الباب واحلى ابتسامة كانت واقفة وراه، وكالعادة وزي كل مرة بشوفه قلبي الحيوان ده مبيعرفش يسكت، ضربات قلبي زادت وبطني بدأت توجعني، مفوقتش من ده كله الا لما لقيته معدي من قدامي بيكلمني وهو رايح يقعد جمب تيتة:ازيك يا كوكو.
اتكلمت بعد ما ملك اختي ضربتني في دراعي:كويسة كويسة الحمدلله.
باس ايد تيتة:عاملة ايه يست الكل.
طبطبت على كتفه:بخير يا حبيبي،طمني عليك ياحمزة بيقولولي انك مسافر يبني.
-ما انا جايلك علشان كده، ادعيلي يا تيتة لو سافرت هتفرق معايا اوي.
قومت وقفت بعد ما حسيت اني اتخنقت:طب انا هقوم اعملك قهوة يحمزة.
مشيت للمطبخ وانا مش حابة الشعور الي حساه ده، اكيد مش متضايقة انه هيسافر ويثبت نفسه في شغله ودي حاجة اكيد هتفرق معاه بس انا مش قادرة امنع نفسي من اني ابطل اتضايق لمجرد انه هيبعد عني خصوصاً انه لو سافر لسه مش عارف هيرجع امتى!
حتى لو مفيش بينا اي حاجة رسمي ومش متأكدة هو عنده مشاعر ناحيتي ولا لأ رغم انه دعوتي الثابتة دايماً، بس حمزة مش كبيرنا اه لكن اكاد اجزم انه لو مش موجود العيلة دي كلها تروح في داهية.
كنت واقفة مهدية على القهوة وبفكر وجوا دماغي الف صوت بيتكلم، ده شكل اهل الحب صحيح مساكين بجد! حكاوي فيروزه
قاطع كل ده صوته من ورايا وهو جاي يقف جمبي:يساتر يارب انتي مبوزة كده ليه يست انتي.
رديت وانا لسه باصة قدامي:مش مبوزة.
-اممم يعني هو انتي كده مش مبوزة؟ امال لو مبوزة هتعملي فينا ايه؟!
بصتله:حمزة انا مش فيقالك.
اتكلم بقلق بعد ما بص في عيني:انتي هتعيطي ليه؟مين ضايقك يا زينة؟
بصيت للقهوة تاني صبيت الفنجان وادتهوله:محدش مضايقني انا مصدعة شوية، اخرج لتيتة طول اليوم بتسأل عنك،خليها تشبع منك قبل ما تسافر.
سيبته وخرجت البلكونة تاني، ساعات مبيبقاش لينا الحق اننا نتضايق من حاجة معينة وفي نفس الوقت مبنقدرش نمنع نفسنا من ان الحاجة دي فعلاً تضايقنا، مليش الحق اني اخد منه موقف انه هيسيبني ويمشي لان ببساطة….هو لسه مش معايا!
عدى شوية وقت لحد ما لقيته جاي يقعد على الكرسي الي جمبي:افضلي اتنططي انتي من المطبخ للبلكونة وانا اتمرمط وراكي كده.
بص ليا لما ملقاش مني رد:يلهوي! زعلانة مني للدرجة دي.
خدت نفس وانا بغمض عيني علشان معيطش وبعدين بصتله:مقولتليش ليه انك مسافر، عرفت من عمتو الصبح وهي بتقولنا…حتى لو مش هتاخد رأي كنت عرفني دي كانت بتكلمني على اساس اني عارفة منك اصلاً وبتق….
قاطعني:لو عايزاني مسافرش مش هسافر.
سكت وانا لسه ببصله وبعدين اتكلمت:انا عايزاك مرتاح يحمزة ومبسوط وناجح حتى لو بعيد عننا كلنا، انا متضايقة منك علشان مقولتليش وانت عارف اني قبل ما اخد اي خطوة في اي حاجة بقولك الاول،حتى لو مش عايز تاخد رأي بس على الاقل كنت عرفني.
-مكنتش هعرف اقولك انا يازينة، مكنتش هستحمل اشوفك متضايقة زي دلوقتي كده وارمي ورايا واسافر برضو! حكاوي فيروزه
ابتسمت:انا اتفاجأت يحمزة بس، ومش هقدر اخليك متسافرش، سافر وارجع تاني انا هنا مستنياك اهو.
اتنهد:انا بحبك يازينة، انا بحاول وبعمل كل ده علشانك هو ده السبب الوحيد والله، مش سهل عليا ابعد عنكوا كلكوا ولا سهل اسيبك ومشوفش العيون الجميلة دي كل يوم الصبح، بس غصب عني هي الدنيا كده…علشان استاهل تبقي معايا في الاخر، هتستنيني؟
هزيت راسي ب اه وانا ببتسم بفرحة ودموعي في عيني:هستناك يحمزة.
عدى على يومنا ده اربع سنين، اربع سنين عيني ملمحتش طيفه،اربع سنين! اربع سنين يحمزة!
المكالمات مكانتش كفاية، مكانتش كتير لانه اصلاً مكانش فاضي كنا يدوب بنطمن عليه وهو بيطمن علينا، ومابين البيت الطويل العريض الي مليان شباب واطفال ده كنت حاسة اني لوحدي لمجرد انه مش معايا، عايشين في بيت عيلة بابا من ساعة ما ماما وبابا اتوفوا،قاعدين انا وملك وتيتة في شقة،اتحولت حياتي من بعد ما كان بيني وبينه شقة ويوم ما بيغيب عني بيقى يومين بالكتير لحياتي الي دلوقتي دي.
كنت واقفة تحت في المطبخ مع بنات العيلة،الي بتعمل شاي والي بتعمل قهوة والي بتغسل المواعين،بس كلنا بندندن مع الاغنية الي عمو مشغلها برا على الراديو القديم بتاعت ام كلثوم.
ملك بصتلي وهي بتضحك وبتدندن معاها:أهل الحب صحيح مساكين.
ضحكتلها وبصيت قدامي تاني وانا بتنهد غمضت عيني وقولت بصوت واطي:ارجع بقا يحمزة متبقاش رخم.
فتحت عيني بخضة لما سمعت صوته وهو واقف على اول المطبخ:وحشتوني يولاد الايه.
صوتهم بقا عالي على شوية صويت وهما مش مصدقين انه رجع وكلهم بيسلموا عليه،
فضلت واقفة مكاني وانا مدياهم ضهري،اصل اكيد اكيد انا في حلم اه،
كنت مغمضة عيني قلبي هيقف والله،سامعة صوته وشامة ريحته حواليا،لحد ما الصوت الي كان حواليا مبقاش موجود فتحت عيني وانا بكلم نفسي:هو هيطلع حلم والله في الاخر.
لفيت علشان اشوفهم مكانش فيه ولا بنت منهم كلهم خرجوا بس…بس هو كان واقف، نفس الابتسامة الي بتخطف قلبي،متغيرش لسه زي مهو….مُهلك لقلبي.
قرب مني وهو لسه مبتسم:وحشتيني.
طلعت نفسي الي كان لسه مكتوم وانا بتكلم:وانت كمان يحمزة، بقا اهون عليك كل ده؟
مسك ايدي:لأ الله يسترك مش وقته تقطيم انا بجلد ذاتي لوحدي، بس يستي اهو مفيش وجع قلب ولا ليا ولا ليكي تاني، هنرتب لجوازنا وشغلي كله بقا هنا،حتى لو هسافر تاني هاخدك معايا مش هسيبك.
ضحكت وانا بمسح دموعي:اخيراً وصلنا للمرحلة دي!
-كنت عارف انك هتستنيني يازينة.
بصتله وانا بقف بثقة:مقولكش كام عريس كانوا هيخطفوني منك بس شكل كده ربنا بيحبك.
رفع حاجبه:يشيخة؟!
هزيت راسي:اه عندك شك ولا ايه.حكاوي فيروزه
-اه وايه كمان حصل وانا مش هنا؟
بصينا احنا الاتنين على باب المطبخ لما سمعنا صوت ملك وباقي البنات:يلاهوي حاجات كتير مقولكش.
بصلهم:لا لينا قاعدة يحبايب قلبي.
اتكلمت وانا بزغرلهم:قاعدة ايه بس وليه تكبير المواضيع ده دول اصلاً فاضيين وبلا حياة،انا بقول تطلع تاخد دش وتنام وترتاح علشان تصحى نشوف هنتجوز امتى.
اتكلموا كلهم من على الباب في صوت واحد:اوووووه.
بص ليا وهو بيضحك:ده يوم المُنى والله.
ملك بصت للبنات وهي بتتكلم:مساكين مساكين اهل الحب دول يعني مش كلام.
……….
